Vaksenopplæring

Kokkfaget

Vg1, Vg2, Vg3 - Restaurant og matfag/ til kokk (MFY)

Dette er faga for deg som er interessert i servering, matforedling og matproduksjon.

Modulstrukturert opplæring (MFY) er ein måte å organisere opplæring, fram mot fag- og 
sveinebrev, som er betre tilpassa deg som vaksen. 

Hovudopplæringa vil skje meir i bedrift og mindre i skule.
Modulane kan gjennomførast i den rekkefølgja som passar for deg.

Vaksengartnar

Denne utdanninga gir deg kompetanse innan praktisk og teoretisk gartnarfagleg arbeid slik at du kan gå ut i lære i gartnarfaget etter vg2 (fyrste år).

Kursa er samlingsbaserte. Utdanninga gir deg innsikt i berekraftige driftsformer og omstilling i tråd med utviklinga i samfunnet. Du får kjennskap til ulike produksjonsprosessar og utviklar praktiske kunnskapar som gartnar. Utdanninga er på deltid og er lagt opp med fysiske samlingar i Ulvik.

Vaksengartnar består av:

• Fyrste år:

        · Vg2 Landbruk og gartnarnæring, med vekt på gartnarfaga. Det vert sett standpunktkarakterar i alle fag og året vert avslutta med tverrfagleg eksamen.

• Andre år:

      · Kurs som byggjer på læreplan for tidlegare Vg3 Gartnarfag. Kurset gjev ingen formell kompetanse med standpunktkarakterar og eksamenskarakterar. Det vert gjeve ut eit kursbevis som viser kva deltakarane har fått opplæring i.

Kunnskapsdepartementet fastsette våren 2020 ny opplæringsmodell for gartnarfaget. Dette er ei endring frå eit tre-årig skuleløp som gav yrkeskompetanse, til ein modell som fører til fagbrev. Difor fører ikkje det andre året på vaksengartnaren til formell kompetanse.

Aldersgrensa for inntak er 25 år. Det er ikkje deltakaravgift. 

Det er krav om kompetanse tilsvarande vg1 naturbruk ved inntak. Dei som ikkje kan dokumentere kompetanse på dette nivået, vert realkompetansevurdert i programfaga før inntak. Deltakarane må også dokumentere kompetanse i fellesfag, tilsvarande læreplanen for studieretninga, før utskriving av vitnemål. 5 års yrkeserfaring gjev fritak frå kravet om fellesfag, dersom søkjaren er 25 år eller eldre (Forskrift til opplæringslova § 1-13, siste ledd).